e-pos  judithdebeer@webmail.co.za

                openbaringe@yahoo.com  
 

Judith de Beer is ’n eindtyd boodskapper wat onder geen leiding van enige

menslike denkrigting staan of aan enige organisasie, instansie, sekte of

kerk behoort nie. Sy ontvang geen donasies of vergoeding van enige aard

nie en daarom mag geen openbaring deur haar ontvang hetsy dit op die

internet, in boek- of traktaatvorm is, onder enige omstandighede verkoop

word nie. Heeltemal gratis word dit vanuit die Gees ontvang en heeltemal

gratis word dit as waarskuwing en bemoediging in hierdie tyd deurgegee

waar elke leser dit met behulp van die onderskeidingsgees kan ondersoek.

Openbaring 141
Die liefdelose balk van oordeel.
10 Oktober 2007 6:00
http://www.openbaringe.co.za/

Judith de Beer
Menig skrifstudent beskou hulself as die volleerde antwoord op alle wysheidsvrae
en van hul wil Ek graag weet:
Wat maak van jul die uitsondering om julself bo julle medemens te wil verhoog, wat
op hul manier hulle weg na My probeer vind. Wie of wat gee die een mens die reg om hoogmoedig en in grootheidswaan, ʼn oordeel oor ʼn ander se geloof en liefde vir My, uit te wil spreek.

Aan hierdie baie slim skrifgeleerdes onder die mense, wat My weer, net soos hulle voorgangers van tweeduisend jaar gelede, netjies uit hul pad, met hulle sogenaamde skrifkennis wil stoot, om hulself sodoende op My regterstoel te kan verhoog, om vandaar hul oordele oor "sondaars" te kan uitspreek, wat My in die liefde van hulle harte wil aanbid, aan julle sê Ek weer, dat Ek sal woon in elke sondaarhart, waar Ek in liefde welkom is. Wie is daar onder julle wat My dit, met sy vele wette en skrifkennis gaan verbied.

Haal daarom eers die liefdelose balk van oordeel uit jul eie oog, sodat julle self siende kan word en so ook die ware weg na My hemele kan vind, voordat jy jou broer, met
jou hoogmoedige oordele en liefdelose instruksies, op ʼn ewige dwaalweg wil bring.

Aan My geliefdes sê Ek, dat Ek elke kosbare kind van My persoonlik ken,
wat altyd in deemoed, water van liefde op die gloeiende kole, in julle hittige
en soms hatige debatte gooi.

Ja, salig is hierdies, omdat dit julle is wat My nuwe Aarde gaan beërwe.


Openbaring 142
Satan as "moderne verlosser"
11 Oktober 2007 07:00
http://www.openbaringe.co.za/

Judith de Beer
Satan is huidiglik besig om in die glansryke gedaante van ʼn moderne verlosser
nader te staan. Onder die "vaandel" van die sogenaamde "super intelligente hervormers”, tree hy nou lagwekkend na vore, om sy eie sorgvuldig-aangepaste,
maar uitgediende kerkleerstellings weereens te kom hervorm. Ja, dit wat vir baie
jare as valstrik vir die Christendom gedien het, maar nou weer uitgedien is.

Met sy eenwêreldorde in sig, het die tyd vir Satan gekom om sy eenwêreldgodsdiens, verwelkomend vir almal oop te gooi en willekeurig word alle leerstellings nou weer deur hom herformuleer. Reeds verblind, aanvaar menig kerklidmaat sonder enige teëstribbeling Lucifer se nuwe leer. Elke afgod en geloof, word met erkenning en
liefde in die Christendom geakkommodeer en onder ʼn eenwêreldgodsdiens word
alle gelowe onder een dak geabsorbeer.

Die mens wat tog so graag as slim wil deurgaan, knik hul hoof dom in erkenning
saam en knielend lê hul, hulle kosbare erfenis en geloof in die valse verlosser, ja,
die versoeker se skoot.
Hoe hard Satan ookal probeer om My geboorte, kruisiging, asook My opstanding, verdag te maak, EK IS, en bly die enige, enkele, suiwer Goddelike Identiteit, wat met
My Menswording ʼn suiwer voorbeeld en leer na die Aarde gebring het.

Nadat Ek ʼn volledige suiwering oor hierdie bose wêreld gaan bring, sal dit weereens slegs die suiwer Waarheid wees wat vas soos ʼn rots, ewig oor alles en almal, sal bly staan.


Openbaring 143
Groot gaan wees die nood.
12 Oktober2007 10:00
http://www.openbaringe.co.za/

Judith de Beer
Groot gaan wees die hongerdag, wat op die hele wêreld wag.
Nêrens gaan daar ʼn kind wees wat uitbundig lag. 
Honger gaan daar menigeen, na brood vanuit die hemel smag.
Weemoedig gaan engeleskare die mens betrag,
wat in ellende en wanhoop diep versmag.

Groot gaan wees die mens se honger en sy nood,
in vullishoop gaan ʼn waardig mens rondkrap vir ʼn stukkie brood.
Doelloos gaan daar menigtes rondloop.
Nêrens gaan daar wees ʼn bietjie hoop.
Met geld sal niemand iets kan koop.
Van alle waardigheid is elke een gestroop.

In ʼn donker en onheilspellende nag,
gaan Satan hardop vir die mensdom lag.
Meewarig gaan hy hul op en af betrag,
terwyl hy spottend vra na al hul aardse prag.
Tevrede gaan hy uitkyk oor sy goeie jag.
Vele siel gaan daar onder sy donker mag versmag.

Waansinnig sal die handelaar nog steeds wil koop en verkoop.
Ewig is daar niks wat hom tot wysheid toe kan noop.
Oral waar die honger saam met die dood rondloop,
daar probeer die handelaar vir oulaas nog sy siel verkoop.


Openbaring 144
Met ʼn omkoopplan.
13 Oktober 2007 7:30
http://www.openbaringe.co.za/

Judith de Beer
Met ʼn omkoopplan, staan menig land gereed, om die politieke winde in hul eie guns
te maneuvreer. Maar wêreldwyd gaan regerings die een terugslag na die ander in hul eie binnekringe en geledere ondervind. Meedoënloos vir ʼn Judasloon, gaan amptenare mekaar uit hul pad uit stoot.

Wêreldwyd is daar weinig mense oor wat in patriotisme nog regtig iets vir hul eie
lande voel en gaan dit net daarom, om die inhoud van hul eie sak te vergroot. Met omkoopgeld het menig vyande mekaar se lande met hul eie pionne geïnfiltreer.

Kernwapens word vooropgestel om die aandag weg te keer. Met ʼn goed beplande biologiese plan, staan lande van die Noorde klaar gereed om Israel en sy bondgenote in Europa aan te val. Omverwerping en sluipmoord is aan die orde van die dag. Irak
wil na eie keuse ʼn regering oor homself aanstel.


Openbaring 145
 In ʼn bloedige helput.
14 Oktober 2007
http://www.openbaringe.co.za/

Judith de Beer
Die Goddelike beskerming waaronder die mense van Suid-Afrika daagliks gaan,
word deur baie as vanselfsprekend aanvaar. Aan diegene wat met bravade en ʼn
blasé houding dink dat onluste en oorlog bloot ʼn vae onwerklikheid is, wat slegs op andere van toepassing is en ook dat dit iets is wat nooit met hulle in hulle gemaksone gaan gebeur nie.

Aan hierdies wil Ek graag sê: "Julle sluimer in ʼn gekkeparadys en in ʼn bloedige
helput gaan julle skielik ontwaak". Geskiedenis het die manier om homself telkemale
te herhaal en vir baie eeue lank is bloedige konflik op hierdie kontinent aan die orde van die dag.

In bykans elke Afrikaland was daar nog altyd die een of ander vendetta tussen Wit en Swart aan die gang en binnekort gaan die bodem van Afrika haarself weer met die bloed van haar bewoners voldrink.


Openbaring 146
Die ‘ou man van Afrika’.
15 Oktober 2007 8:00
http://www.openbaringe.co.za/

Judith de Beer
Net soos wat dit baie lank gelede geprofeteer was, het alle lande reeds oor die Aarde heen "vrede" geskreeu, waar daar geen vrede was.

Net soos wat die ou man van Afrika se gesondheid besig is om weg te kwyn, so sal
die valse vrede oor die horison van Afrika verdwyn.

Daarmee saam sal daar nêrens oor die oppervlakte van die wye wêreld heen, meer ʼn enkele vredesliggie skyn. In skrik en bewing sal die bewoners van die Aarde dit angstig uitroep in hul pyn. In wanhoop sal die massas hul daarheen haas, waar Satan chaoties, in sy volle heersersgloed nou skyn.


Openbaring 147
Goddelose onsin die wêreld ingeploeg.
16 Oktober 2007 10:00
http://www.openbaringe.co.za/

Judith de Beer
Praat en nogmaals praat is al wat die mensdom deesdae wil doen.
Menig mens wil van die oggend tot die aand na die sinnelose klank van hulle eie stemme luister. Met nimmereindigende groot maar leë woorde. In doellose lang toesprake en gesprekke, lei die politikus en kerkleier die mens willoos aan hul neuse rond.

Om boonop by alles wat heilig is te sweer, is onafgebroke besig om in hulle midde te gebeur. Dwase wat van die oggend tot die aand onsin uit wil braak, is die leiers wat oor die ganse mensdom waak.

Met tonge waaruit leuens en bedrog voortdurend drup. Waaruit geen waarheid ooit kan kom, word hulle ewe dom navolgers, oor die ewige afgrond gestoot. Daarom sal dit nou weer wees, soos wat die woord van toeka spreek.

Goddelose onsin het die wêreld ingeploeg. Die vrug van sy eie leuens en bedrog
gaan die mens nou oes. Hulle eindelose gepraat, sal in die rumoer van oorlog ondergaan.


Openbaring 148
Verstands- en geestelik ingestelde mense.
17 Oktober 2007 7:00
http://www.openbaringe.co.za/

Judith de Beer
Indien die mens die vermoë sou besit, om homself waar ookal in die ruimtes te kon bevind, sou dit wees asof hy homself maar net weer op ʼn vreemde wêreld bevind.
Sou hy sy oë na die hemele opslaan, sal daar nuwe ruimtes en heelalle voor sy oë oopgaan. So sal dit vir ewig aangaan.

Ewig sal die mens alle ruimtes kan deurkruis, maar nooit sal hy kan sê, ek het die hemel gevind, waarin God homself bevind. Omdat dit ewig onmoontlik vir die fisiese mens was, is of ooit sal wees, om die Godheid
in die ewige ruimtes op te spoor en hy daarom vir "bewyse" homself nog altyd op ander se "hoorsê woord" moes verlaat, het Ek die mens tegemoet gekom en Myself
as Lewe op die aarde kom vertoon.

Ja, slegs in die bewuswording en die lewe self, kan die mens My vind.
Nog altyd was daar twee groepe mense, waarvan die een groep die liggaamlike verstandsmense is. Deur middel van logika en verstandelike vermoëns, gaan hulle vanuit ʼn riglyn en in ʼn raamwerk vir hulself ʼn logiese beeld van hul God opbou.

Waar die tweede groep, wat meer geestelike ingestelde mense is, met hul liefde
en hul hoop, daarin gaan poog om vir My ʼn woning in hul harte te bou, om My so
in hul geloof met hulle eie lewe te omvou. In hierdie lewe, waarin die ware lewe ontwaak het, kan so ʼn lewende siel nooit weer in die dood ontslaap nie en is dit
slegs hierdie volmaakte lewe wat oor die vermoë beskik, om vanuit die materiële ewighede, in die lewende hemele oor te gaan.


Openbaring 149
Deur hulself ʼn oordeel gevel.
18 Oktober 2007 5:30
http://www.openbaringe.co.za/

Judith de Beer
Terwyl daar oral gerugte van oorlog sal wees en van menige kataklismes wat die mense in die media lees, sal die kennis weereens die liefde versaak. By baie sal My Gees heeltemal ontbreek. Stene vir die profete sal daar in oorvloed wees en so sal
die skrif in die eindtyd hom as ʼn oordeel self herhaal.

Terwyl die koninkryk van God naby sal kom, sal die skrifgeleerde seuns, weer net soos hulle oervoorvaders, dieselfde Godslasterlike woorde spreek en beweer; met Beëlsebul en bose geeste se hulp, geskied God se wil.
Deur hulself is ʼn oordeel gevel en oor duisende jare heen, sal pa en seun, mekaar se regter wees.

Geslagte lank is daar geprofeteer,
 eendag sal God vanuit die mond van sy heilige volk regeer.
 Die wat My opreg in hul harte begeer,
 aan hulle sal Ek verleen, hierdie grote eer.
 

Openbaring 150
Die verskil tussen genade en liefde.
19 Oktober 2007 6:00
http://www.openbaringe.co.za/

Judith de Beer
In ʼn volmaakte wêreld sou genade oorbodig wees, omdat genade die praktiese uitoefening van deernis is. Deernis word op haar beurt uit die sagte gloed van
liefde gebore. Dit is liefde wat meelewing met alles het wat in onvermoë en wanhoop spartel.

Neem as voorbeeld ʼn moeder wat in barensnood in angs haar pyn uitkreet en Ek
haar in genade en met Liefde te hulp snel. Ook die nuwe aankomeling, wat in asemnood sy koms uitkreet, sal Ek met My Liefde en genade op sy moeitevolle lewenspad bystaan.

Die mens kan egter nie net genade ontvang nie, hy moet ook leer om dit self met praktiese liefde aan ander uit te deel. Om hierin te kan ontwikkel, word die mens op vele maniere daarin geoefen. Hierdie lewensoefeninge kom meestal in die onaangename vorm van teleurstellings, wanhoop of siektes, en weer is dit hier waar Ek die mens met My genade dra.

Ook wat die mens se geestelike groei aanbetref, gaan dit soms moeilik.
Deur baie trane, val en weer opstaan kom Ek die mens in sy geloofstryd tegemoet.
 Wat maak die een mens beter as die ander, dat hy bloot op die meriete van My
genade gered sal word, terwyl biljoene ongelowiges sonder My genade vir ewig
in die hel moet ondergaan.

Daar is bykans nie nog ʼn land of bevolking, wat nie op die een of ander manier al van My gehoor het nie en wat My nogtans deur die vryheid van hul eie keuse verwerp. Indien Ek hul met My "genade" gelowig sou maak, sou dit dwang en nie My Liefde wees, wat hul na My sou bring.

Die lewe en geloof is een voortdurende stryd en met My Liefde en genade
kan enigeen wat wil, as ʼn oorwinnaar uit die stryd uit tree. Net soos wat Ek in ongekende liefde, My genade kosteloos aan jul uitdeel, net so moet julle weer julle liefde en genade, prakties en onbaatsugtig aan ander uitdeel.